DOCE MIL PROFESIONAIS VISITARON A QUINTA EDICIÓN DO SALÓN DE DELICATESSEN Entre as actividades desenvolvidas destacaron o Seminario sobre Distribución e o show cooking Uns 12.000 profesionais visitaron a quinta edición do Salón de Denominacións de Oríxen e Delicatessen, celebrado no Instituto Feiral de Vigo entre os días 21 e 23 de outubro, e que contou co apoio de Caixanova. Segundo os datos recollidos pola organización, a maior parte dos visitantes foron restauradores e hostaleiros procedentes da comunidade autónoma galega, aínda que tamén se contabilizaron profesionais de Portugal e de áreas como O Bierzo ou León.
Nesta edición do Salón constatouse que na actual conxuntura económica persiste un nicho de mercado moi consolidado para os produtos alimentarios de calidade, e tamén que o consumidor cada día ten unha maior formación sobre os produtos con Indicación Xeográfica Protexida e os de delicatessen.

No Salón de Delicatessen estiveron representadas catrocentas marcas, 60 expositores directos, máis dunha vintena de denominacións de orixe, destacados comercializadores e unha interesante presenza de produtores de distintos puntos de España.

Como en edicións anteriores, tiveron un protagonismo moi especial no certame as actividades complementarias, que obtiveron unha magnífica acollida entre os profesionais.

Entre elas cabe destacar o Seminario sobre “A distribución: clave do éxito para o sector da restauración”, que se desenvolveu o día 22, promovido por Caixanova e a Confederación de Empresarios de Pontevedra, e no que se analizaron temas como “A distribución como clave na mellora da competitividade do sector da restauración”, “Experiencia da distribución en Grandes Superficies” ou “Presente e Futuro da distribución no sector da restauración”.

Tamén lograron unha importante presenza de público o show cooking de cociña, no que participaron tres dos nosos mellores restauradores: Rafa Centeno, do “Maruja Limón”; Pepe Solla, de “Casa Solla” e Xosé Cannas, do “Pepe Vieira Camiño dá Serpe”, e o de sobremesas, que estivo a cargo dun mestre pasteleiro de “El Molino”. O programa do Salón DO 08 rexistrou un interesante debate entre xornalistas, responsables de “blogs” e restauradores, que coincidiron en destacar que a cociña galega atravesa o mellor momento da súa historia, aínda que reclamaron maior axuda institucional para potenciar a promoción dos nosos restauradores no exterior, e tamén contou cunha visita de excepción: a dun grupo de xornalistas británicos que accederon ao certame grazas a unha iniciativa da Cámara de Comercio.

O éxito obtido por esta nova convocatoria do certame deixou de manifesto que a cidade de Vigo en particular e Galicia en xeral son un emprazamento idóneo para esta iniciativa, demostrando que xunto á calidade indiscutible dos nosos produtos contamos con profesionais de primeira liña, tanto no campo da restauración e da hostalaría como no da comercialización de produtos alimentarios.


© Ana Montenegro & Asociados, S.L.
Arenal 138,Oficina 7. E-36201 -VIGO [ España ] Teléfono: +34 986447549 Fax: +34 986 449577
e-mail: info@salonDO.com